أخبار الفن والمشاهير

تامر حسني يرد على حلا شيحة بعد هجومها عليه

رد الفنان المصري تامر حسني، على المنشور الأخير للفنانة حلا شيحة بشأن تبرئها من بعض المشاهد في فيلم “مش أنا”، الذي قامت ببطولته برفقته.

وكتب “تامر” منشوراً عبر حسابه الرسمي على موقع التواصل الاجتماعي “فيسبوك”، قائلًا: “نهاركم جميل يا أغلى الناس، الحقيقة عمري ما بتخيل إني أدخل في نقاش بالشكل دا مع زميل بحترمه وكان في بينا كل خير، للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً، ونتناقش بيني وبينك، فا أنا مضطر أرد هنا برضو”.

وأضاف: “أولاً أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف، الحقيقه إني احترمت كلامي معاكي، وعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة”.

وتابع تامر حسني: “وبعدين الفيلم بقاله 3 أسابيع في السينمات والكليب موجود جوه الفيلم هو بالنسبالك الحرام إننا ننزل الكليب على اليوتيوب بس، إنما الكليب يتشاف جوه السينمات عادي، منطق غريب فعلاً يا حلا، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه”.

واستطرد تامر حسني: “هو مش إنتي اللي صورتيه ومثلتيه بنفسك وبمنتهى الرضا ولاّ حد أجبرك، وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا”.

ووجه حديثه لحلا شيحة، قائلا: “إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع، وبقيتي تقفلي تليفوناتك و تكنسلي علينا كلنا وبعدين أي فيلم بيبقى ليه خطة مسبقة في الدعاية، وأنتي عارفاها كويس ووافقتي عليها ودا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل”.

واختتم حديثه قائلًا: “أنا زعلان منك جداً يا حلا على مفردات البوست بتاعك غير الموفقة ومستحيل هرد بطريقتك اللي فيها تجريح واتهامات باطلة ليا إحتراماً لحجات كتير يمكن فايتاكي بس مش هتفوتني، وعلى فكرة أنا واثق أنك عارفة أني مستاهلش منك كدا وهكتفي بالتوضيح دا وربنا يهدي الجميع، ويكتبلك كل الخير اللهم آمين”.

حلا شيحة :”أنا تبت ودا ميرضيش ربنا”

جاءت تصريحات حلا شيحة بعد يومين من طرح كليب أغنية “بحبك”، الذي يضم مشاهد متفرقة من الفيلم، والذي حقق مشاهدات تجاوزت مليون ونصف المليون مشاهدة منذ طرحه.

وجاءت تصريحات حلا شيحة عبر حسابها على “إنستقرام” كالتالي:

  • تفاجأت بطرح كليب “بحبك” الذي يجمع مشاهد متفرقة من الفيلم، وفي أيام ذي الحجة المباركة، بعد وعد تامر حسني لي وتأكيده احترام رغبتي.
  • يمكن نكون نجحنا بمقاييس الدنيا، ولكن بمقاييس ربنا نحن لم ولن ننجح.
  • أنا متأكدة أن زملائي “جواهم خير بس للأسف فتنة الشهرة والنجاح مش بتخلينا نشوف ونقيس الأمور صح”.
  • من قلبي كليب “بحبك” ميرضيش ربنا، وأنا عيطت لأني شفت نفسي في المشاهد دي، وده كان زلة نتيجة ظروف مريت بيها وكلنا بنغلط.

أنا توبت عن المشاهد دي، وهي لا تصح، وأنا غلطت وبصلح، أهم حاجة إن ربنا يرضى عني لأن في الآخرة اللي هينفعنا مش الشهرة ولا النجاح، وهو أصلا مش نجاح لأن النجاح الحقيقي حاجة تانية خالص أغلبنا ناسينه إلا القليلين مننا.

حلا شيحة لـ تامر حسني: “فاكر لما قولت مش عايز أموت مطرب”

وفي حديثها لـ تامر حسني، قالت حلا شيحة: “أحب أفكرك بالفيديو ده يا تامر اللي قولت فيه أنا مش بتمنى أموت وأنا مطرب، أنا دايما خايف من كده، كلام أكيد قولته في لحظة صدق جواك وجوانا كلنا، شوفه تاني يمكن يفكرك إنك جواك أكيد في صراع، وأنا وكلنا بنغلط بس المهم في الآخر نتدارك الغلط ونصلح”.

وأضافت :”لو أصواتنا ومواهبنا كلها نستعملها في الخير عشان يبقي فن بجد”.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى